Иман ша доцучохь, эьхь хир ма дац -
Эьхь а ша доцучохь, юхь хир ма яц.
Юхь а ша йоцучохь, яхь хир ма яц -
Яхь а ша йоцучохь, доьналла а дац.

Доьналла доцучохь, хьуьнар ма дац -
Хьуьнар ша доцучохь, г1иллакх ма дац.
Г1иллакх ша доцучохь, ларам ма бац -
Ларам ша боцучохь, тешам ма бац.

Тешам ша боцучохь, марзо ма яц -
Марзо ша йоцучохь, безам ма бац.
Безам ша боцучохь, барт хир ма бац -
Барт  а ша боцучохь, цхьа алла дац.

Цхьа алла доцучохь, ниц1къ хир ма бац -
Ниц1къ а ша боцучохь, г1ора ма дац.
Г1ора ша доцучохь, толам хир бац.
Толам ша боцучохь, маршо ма яц.

Маршо ша йоцучохь, Дин хир ма дац -
Ислам ша доцучохь, 1илма ма дац.
1илма ша доцучохь, хаар ма дац -
Хаар ша доцучохь, довзар ма дац.

Довзар ша доцучохь, корта ма бац.
Корта ша боцучохь, Шар1а ма дац.
Шар1а ша доцучохь, Суннат ма дац.
Суннат ша доцучохь, Эьлча ма вац.

Эьлча ша воцучохь, хьукум ма дац -
Хьукум ша доцучохь - Шафа1ат дац.
Шафа1ат доцучохь, ирс хир ма дац -
Ирс а ша доцучохь - Ялсамане яц.

Ялсамане йоцучохь, нийсо ма яц -
Нийсо ша йоцучохь, къинхетам бац.
Къинхетам боцучохь, Аллах1 ма вац -
Аллах1 Ша воцучохь, кхане ма яц.

Кхане ша йоцучохь, т1аьхье ма яц -
Т1аьхье ша йоцучохь, кхетам ма бац.
Кхетам ша боцучохь, хьекъал ма дац -
Хьекъал ша доцучохь, барам ма бац.

Барам ша боцучохь, къепе  ма яц* -
Къепе ша йоцучохь,1алашо яц.
1алашо йоцучохь, лаам ма бац -
Лаам ша боцучохь, т1алам ма бац.

Т1алам ша боцучохь, беркат ма дац -
Беркат ша доцучохь, бохам ма бу.
Бохам ша болучохь, мостаг1 ма ву -
Мостаг1 ша волучохь, 1азап ма ду.

1азап ша долучохь, харцо ма ю -
Харцо ша йолучохь, бала ма бу.
Бала ша болучохь, эшам ма бу -
Эьшам ша болучохь, хьовзам ма бу.

Хьовзам ша болучохь, гатто ма ю -
Гатто ша йолучохь, г1айг1а ма ю.
Г1айг1а ша йолучохь, цамгар ма ю -
Цамгар ша йолучохь - 1ожалла ю.

Таьргало: Барам а боцучохь, къепе  ма яц* - Низам

Аьрсбин Абу-Бакр 

27.10.99. шо